Chopy zresetujcie se mapy

Coś sprawy budowniczych polskich dróg niejednemu w łostatnim czasie uwarziły krew. Ale zawsze tyn temat drzaźnił wiela sie do. O autobanach jak w Raichu mogemy yno pomarziyć. Ło ekspresówach ni ma co godać, bo tych tela, co maśloków na śniegu. Som nawet miejsca, kaj droga jest porzondano, a ni ma jej w,ogóle.


Tako Dolina Rospudy doprowadziła do kocigo kwiku niejednego „zielonka_”. Musioł borok tasze załadować, rube zoki łoblykać i na placu koczować. Uwionzoł sie nawet linami i w zimie w lesie pod szmatami kiblowoł. Znerwowali sie i mieszkańcy Augustowa, bo im z hałasu nawet frupy w uszach już pomóc nie mogom. Recht po łobu stronach, ale wyjście z łopresji musi być yno jedno. A wiadomo, że kaj prujom tonowe cienżarówki to i gardiny zmaraszone, i larmo, i pierońskie wertepy na drogach. Zaś ptoki furgajom i szkoda im gniozda buldożerem rozwalać. No to chcom auta wykludzić kajś na zadupie. Jednym sie śpiecho i poprom kożdo koncepcja bele wartko, drudzy czajom problymy, jednak ptoka do łostatnij krwi bronić bydom. Ale to już prezydencki problem i naród ślydzi jeno mondrego rozwionzania. A tukij może być problem. Daleko jednak nie cza szukać takigo zamieszania bo i u nos niezło chryja powstała.

Powodów do larma skuli dróg nie brakuje. Downo temu szło wzionć fechtunk i po gościńcu przegonić rumaka. Jak nie głównom arteriom, to brało sie trasa na przełaj. Przeciś sie szło, a tras na stolica było tela, co jeźców.

Dzisoj to nie takie proste. Budujonc droga. cza plan łodpowiedni narychtować, poczym naszkryflać go na papiórze. I to nie jedno koncepcja lecz kilka. To jest jak z mostem. Nojpiyrwyj ftoś wymyśli, że most wybuduje, a późnij przeciepie pomysł z łepy na papiór. I tak było w przipadku drogi łonczoncej Pyrzowice ze Zwardoniem, biegnoncej przez Miedźna i Gilowice. Pomysł był. Późnij plan łostoł wyrysowany, yno że pech chcioł, iż na nieaktualnych mapach. Nanieść przewidywano trasa na staro mapa, to jakby łazić po moście kierego ni ma. Bo i to, i to nonsensowne, głupie i capi wiochom. Niestety, u nos w powiecie godały starki, że znod sie taki pieron, kiery był talyntem przełokropnym i z mostem kierego nie było doł sie rada. Wybudowoł. Bo jak konsultujom z narodem budowa drogi na mapach, kiery już świat łoglondać nie powinien to strach biere, coby i tukij nik sprawy nie zmaścił i nie wybudowoł drogi, po kierej nik nie pojedzie. A bajtlik naplompuje - rzecz łoczywisto.

Piotr Łapa