Moj brat bliźniok

08.11.2006, 16:06


Jak se tak łaża ulicami Pszczyny, to czasami ślypia mi mgłom zachodzom, kiedy widza wielodzietne familie, kaj bajtli wiyncyj niż u Lojca Wirgiliusza. W sumie to mom siostra i gryfno z niej frelka, ino jakoś zawsze mi tego bracika brakowało. Nie bylo z kim z gabli w biksy poszczelać, i za młodego na somsiedzki plac na rab, czi nawet łod czasu do czasu przi niedzieli po tutach sie wyszczekać.

Siora tyż by chciala drugiego bracia „gagatka”, pomimo tego, że jedyn miglandz we famili juz jej pod kiecka zaglondoł i podczas kapieli judasza łokupywoł. W kupie zawsze raźnij, bez to lepij idzie sie przez życie. A byłech rod, jakby nie doś że bracik sie narodził, to na dodatek bliźniok. Wtedy to juz jajca z kożdego idzie robić. Mało wto mo dar rozpoznania, kiery jes kiery i nie roz szłoby sie rolami zamienić. Skuli tego nawet żech muterka na błogoslawiony stan namawioł, ale na nic zdoły sie moje godki. Ni mom i mioł go juz nie byda. A szłoby sie tera tak do prestiżu we wyborach ramie w ramie startować.

Godajom, ze na politykowaniu idzie sie przejechać, bo nie roz kamraci z ekipy łostawiom cie jak zgnite jabco z innymi „nieprzisfajalnymi”. Bracik zaś nie łostawi cie nigdy - ani jak w trąba po cimoku na mieście zbierosz, ani jak dyrechtora w budzie dopadajom nerwobóle na widok wystepków jednego z dwóch ło podobnych pyskach, ani jak człeka skażom na politykiersko banicja - zawsze stanie w łobronie. W polityce, tak se myśla, szłoby sie nieźle ustawić, bynajmij spotkołech sie już z takimi łopiniami. I tak na przikładzie, bracik startnełby sie na miejski tron i tam grzołby sie sztyry litery, a jo wtedy poszołbych w bój ło fotel starosty. Wówczas w chłodne wieczory robota można przikludzać do dom i zamiast na urzyndach koalicje idzie sie w chaupie ustawiać. A nojlepij w niedziela u muterki przy roladzie. Zaś jakby rodzonymu nie szło, tyż nie łostawia boroka i wzionbych ciężar zadań burmistrza na wlasny pukiel. Familia cza wspierać i cza jej pomagać. Po co zdradzać, że chop se nie radzi jak miasto wzienoby synka na jenzyki. Łon by figurowoł i zic burmistrzowski piastowoł, a jo jako szaro eminencja dartych za wszystkie linki i na szczeblu miejskim i na starościńskim.

Tako familijo na urzedach to chyba siła nie do łobalynio. Zawsze jak coś nie póndzie, łobstawi sie swoimi chopokami z placu na wydziałach i na komisyjach, bo niech inni tyż se radzom. Reszta dla spokoju cza łoddac, bo nie wolno wsziskigo chapić i w końcu o imie dobrych opozycyjnych układów warto sie zatroszczyć, coby zadziorów nie bylo. Nojważniejsze, że nic po łomacku. Podobno tera cza sie dawać pozór, bo straszom, że przindzie czas, kiedy w kozdym miescie i w kazdej gminie bydzie jaki lobcy babsztyl kiery najpjyrwyj podpósci do malego grzeszku, a pózniej w swiat pósci godka jak sie zalatwio urzyndowe rzeczy. (bo sie lokaze ze te zlote zemby to nie dochtorski majstersztyk a gibis i mikrokamera) Ten prziklad to kolejno rzecz kaj bracik stowo sie jedynym pewnym punktem loparcia. Lon bynajmi pary z gemby nie pósci i zawsze bydzie ja miol na klódka zawarto choby w pysku miol i te same kamery. Przykryje je, może blombom zalato ale sposób znojdzie.

Ale z drugij strony lo co martwić sie na zapas, przeca to yno jakies wyimagowane domysly, bo nik chyba tak w polityce nie robi, ani na szczeblu lokalnym ani centralnym. Nie wypado coby reprezentant spoleczenstwa ciemne kontrakty zawieral i paczol jedynie wlasnego koryta. Czasem idzie zajrzec i w cudze koryto - by cosik drugiemu podmaszkecic

Piotr Łapa

T G+ F

Komentarze:

Świąteczny Weekend Zakupów w Pszczynie

Świąteczny Weekend Zakupów w Pszczynie

d wielu lat w okresie bożonarodzeniowym spotykamy się na Pszczyńskim Jarmarku Świątecznym. Z powodu pandemii w tym roku to tradycyjne wydarzenie nie...
35 lat Muzeum Prasy Śląskiej

35 lat Muzeum Prasy Śląskiej

uzeum Prasy Śląskiej im. Wojciecha Korfantego w Pszczynie obchodzi 35-lecie istnienia. Z okazji jubileuszu zastępca burmistrza Barbara Sopot-Zembok...
Uhonorowani przez Sybiraków

Uhonorowani przez Sybiraków

Sybiracy w podziękowaniu za wieloletnią współpracę wręczyli odznaki władzom powiatu i pracownicom pszczyńskiego starostwa
Pszczyna: Budżet na 2021 rok przyjęty

Pszczyna: Budżet na 2021 rok przyjęty

rzyszłoroczne wydatki gminy Pszczyna wyniosą niemal 324 mln zł. Taką decyzję podjęli radni, którzy opowiedzieli się za przyjęciem uchwały...
Apel w sprawie trudnej sytuacji Uzdrowiska

Apel w sprawie trudnej sytuacji Uzdrowiska

15 grudnia Rada Gminy Goczałkowice-Zdrój przyjęła uchwałę w sprawie wystąpienia z apelem do premiera dotyczącym uzdrowiska
Konkurs "Pierwsze zdjęcie na Instagramie"

Konkurs "Pierwsze zdjęcie na Instagramie"

Już wkrótce Gmina Pawłowice będzie miała swój profil na Instagramie. Z tej okazji ogłoszony został konkurs „Pierwsze zdjęcie na Instagramie”