Nowoczesne drogi kole rynku

Jak siedza u zemboka zawsze sie pluja w broda żech sie nie narychtowoł pampersa. Dyć na samo myśl ło wiertaniu mi w japie ciarki przełażom po puklu a szłapy jakoś same sie trzensom. No ale siedza na zicu i rzykom. W poczeklani na szczynście siedzom gryfne dziołchy tak że zarozki robi sie raźniyj. A łone jak widzom takigo boroka jakoś nie majom łoporów coby sie wdoć w godka. Przeca nie wyglondom na jakigos zbokola kiery spod palta zarozki na świat wyciongnie klejnoty i bydzie z gołom żiciom tyroł po gabinecie coby straszyc baby. I co żech usłyszoł? Podobno na miescie godajom że bydymy mieli kole rynku jakies nowoczesne drogi.

Ftoś pedzioł, że sam wykorzystujom nowo technika. Pieron wie na czym łona polego ale jak sie tak w łepie układom puzzle z konsków w całoś chyba już wjym. Na jesień cza buldożerami ze zola ściongnońć cało powłoka. Bez zima sie to łodleży i utwardzi, zaś na wiosna idzie już po lekusiu zabierać sie za robota. Dyć to jes jak z wykopkami jeno na łopak. Na wiosna sadzisz, latem plaszczysz żić na kocu i lukosz jak rośnie, a jesieniom cza zapasać renkowy i brać sie za robota. Nic na gwołt. Sie poczeko, sie zrobi. Już widza jak sie wdzieja gangol - funkiel nówka nienoszony i byda z familiom paradowoł po rynku no i łoczywiście bydymy podziwiac cuda techniki po kierych stompomy. Tak że cza bydzie sie szczewiki łopócować bo maras upapro ulica. Gorzej jednak jak kolerynkowskie wykopki bydom robione innom metodom - i byda mógł sam podziwiac, ino że nie na wiosna a latem w 2012. Jutro byda już wiedzioł wszisko ło tych robotach, bo ida na torg. Ta baba co mi tomaty sprzedowo łona wie wszisko. Jej sie gemba nie zamyko. Łostatnio godała....A łopowiem wom nastympnym razem. Ale usmiołech sie jak staro kobyła, aż mie bebech do dzisioj boli.

pin