Pszczyna tygrysem połednia Polski

Pszczyna tygrysem połednia Polski - wyciepołech z siebie takie stwierdzenie, bo tak po lekku zaczynom mysleć. Zarozki znojdzie sie łosobnik kiery powie, że zdrowo piere mi na czacha, a to co godom to głodne godki i fanzolynie czi po czi. Ale byda czimoł sie swojigo. Zapodołech sie łostatnio spacer miejskimi ścieżynkami, a jak żech już wrócił i siedneł na zicu w izbie to zaczołech łod wyliczania. Ilość inwestycji, wykopków i remontów powaliła mie na zol.

Piyrwsze uderzenie. Chodnik kole budy, po kierym stompom sie idonc na rynek ftoś potraktowoł z buldożera. Kilka metrów dalyj kolejno wymiana nawierzchni. Kiedyś japiłech sie i czepiołech, że z tymi drogami kole rynku sie łobsrowajom. Lepij jednak jak robota sie ślimaczy niźli ni mo jej być wcale, tym bardzij, że tera kasa jes, późnij zaś przendzie kole boku i nic sie nie łobstanie. Kilka kroków dalyj człowiek natyko sie na nowo budowla. Kolejny market w mieście - a rośnie ich u nos łostatnio jak grzibów po deszczu. Tak, że tera zakupy w sobota po czinostej nie wywołajom żodnego komplikatora. I tak jeszcze idzie wyliczać: planowano budowa zagrody dla żubrów, łośrodek sportów wodnych w Łące czy wieża ciśnień. I właśnie...

Jeszcze niedowno nic kole wieży sie nie działo, a tu łoroz poszła pod młotek. Zarozki tyż na miasto wyszła łodpowiednio informacja i sie zaczeło. Kożdy kieremu los pszczyńskij wieży ni ma łobcy zaczoł domniemywać w co ta "ruina" sie przeistoczy. Wiadomo, że jak już zacznom klachać to końca nie widać, zaś co rusz pojawio sie nowy pomysł. Jo łosobiście mom wielki sentyment do tego gmachu. Bez tóż fes sie raduja, bo widziołech bebechy i wszisko łod środka (niedowno swoja siedziba miało tam radio). Budynek jes wiekowy, a jej stan opłakany. Coby ja wyglancować cza bydzie kupka pijendzy w to wsadzić. Na szczynście tera znod sie nabywca kiery wsziskim sie załopiekuje.

A ciesza micha bo jak plan sie powiedzie mogemy mieć kolejno perełka kiero jak magnes ściągnie turystów. Pisali, że na wierchu bydzie restauracja, a kożdy klient nie bydzie właził na góra, ale jechoł zewnętrzną windom. Czegoś takigo w regionie ni ma i nie było. Pomysł na piontka. Bele to była prowda i bele miasto dalyj sie rozwijało, bo fto sie nie rozwijo tyn sie cofo.

ez