Dziura ło kierej kraj usłyszoł

Trudno pedzieć, czy bajtlik mój szczimie takie łobcionżenie, ale po tym co zaczyno sie dzioć, cza bydzie zainwestować w sprzynt i wydać niezło buła pijendzy. A dzieje sie, i to dużo! Durś słyszy sie ło szoferach waryjotach, kierzy chorujom na zbyt ciynżko szłapa. Wcisko taki gaz w decha i pruje, a bajlte i omki traktuje jak luft.

Niestety i u nos w pszczyńskim powiecie gupieloków za kółkiem nie brakuje. Łostatnio czajana polismenów pokozała - stykneł jeden dziyń, a w powiecie dropli 36 napranych jak meserszmity szoferów. Taki natintany łosobnik czasami nawet nie trybi, że prowadzi swoja gablota i zic szoferski plaszczy. Dopiero jak piźnie, paczałki przeciero ze zdziwienia. Ino, że jak mu kopci pod kopułom, a napocho, to już mo fest przekichane. No i spotkać takigo gizda na drodze do przijemności nie należy. Cza wienc przeciwdziałać. Byda musioł kupić sie łodzież łochronno. Zdo sie jakiś nachtopek na dynia coby sie mózgu w razie czego nie łobczaskać. Ponoć tera w necie idzie po taniymu wyhaczyć hałery wojenne na czerep za psie pijondze z dostawom do izby gratis. Najlepij tyż kupić sie rube ciuchy i makówy rajdowe, bo jak w nos czasnom, to kierownica z łapy nie wyleci. Ale najprzód chyba podkuja sie mój wózek glajzami. Może gibko na autobanie gablotom cis nie byda i spola tela co Rudy 102 na trasie na Berlin, ale zawsze bydzie bezpiecznij.

Co jednak najbardzij skłanio mie do tego coby auto sie łobić glajzami. Nie łożarciuchy i szaleńcy co prujom jakby im zarozki łostatnio halba sprzed nosa sfinońć mieli. Nie cykor, że mi sie auto na drodze na dwie połówki rozlezie - yno dziury.

Po zimie padali - dej sie pozór, bo jak kołem ło dziura zahaczysz, to z kołpakami idzie sie żegnać. Tak że piyrwsze dni spendzołech na łoglendzinach nawierzchni. Bele nie gichnońć. Najgorsze jednak, że człowiek gały wytenżo i po kółkach paczi, a nie przed siebie kaj jedzie. Niestety może to sam być zgubne i łatwo zaliczyć gleba. Łostatnio dziura na dwupasmówce ło kierej media pyski na cało Polska darły jes tego przikładem. Bo stan dróg naszych widocznie jes taki, że człek nie zno dnia ani godziny, kiedy na tako perła sie nadzieje i wpadnie do niej już nie kołem, a całym autem. I jedno co sprawdzić sie może, to auto z glajzami. Ciynżkie jak działo przeciwpancerne, ale wyczimałe. Bo widać w tym kraju auto na drodze sie pojawio... i zniko - półtora metra niżej, a szofer wtedy jes załatwiony na cacy.

pin