Sztrom jest, a jednak go ni ma

Wyglondo na to, że we Pszczynie na rynku coś w sieci nawalo. Pieronem cza bydzie odpowiednimu kerownikowi kazować usterka usunoć i nasztalować to, co żyć nie pozwalo. W końcu sezon sie zaczyno, a imprez w hefcie do łodbembnienia naszkryflanych corozki to wiyncej.

Sprawa nie jes błacho. Jak wartko nikt nie chyci klamorów do łapy i problemów nie usunie, dondzie do tego, że na kolejnej imprezie na rynku postawiom ze czi kible sztromu i ze sztyry koła, z kierych dynama zdobyczno energia poleci. Pech w tym, że jak już ułan, kosynier, harnaś i pszczyński pogromca mocy druta nie ciongnie i z ciupaskom po rynku nie loto, to coś samo łod siebie w elektryce dostowo niemocy. Fto bywoł na kilku imprezach, mógł sie łobadać, że po prowdzie coś nie funguje. I pech dopodł niedowno fojermanów. Jak prasło to yno roz i tela my słyszeli. Godali coś ze sceny, yno że w dali prziypominało to godka do samego siebie. Mimo że widz próbowoł wyłowić kożde zdanie, to ani jedno słowo na zadek nie doleciało. Tym ze zadku pozostało jedynie zejrzeć, jak gryfne dziołszki dokoła paradujom.
A to tyż atrakcja, bo jak nie do ucha, to bynajmij zadbano o to, że było dla oka. Niejeden nawet bryle na gibko przecieroł, coby mieć lepsze pole widzynia.
Nic nie trwo wiecznie to i w końcu sztrom kablem popłynoł. Lampa konsoli zabłysnyła sygnalizujonc koniec awarii i nadszeł czas impreza kontynuować. Niestety, wszisko co łoficjalnie miało byc powiedziane, łostało.
Na szczenście grochówa, kierom dzielili, nie jest zależno łod sztromu. Bo ona zawsze być musi - i była. A Pszczyna tyż mo swoja moda, jako nieliczne miasto stawio na wystempy bez sztromu, czyli unplugged.

lapp